ກອງປະຊຸມໃຫຍ່ຄັ້ງທີ VI ຂອງໜ່ວຍພັກກົມອຸດສາຫະກຳແລະຫັດຖະກຳ

ກົມອຸດສາຫະກຳ ແລະ ຫັດຖະກຳໄດ້ຈັດປະຊຸມໃຫຍ່ຄັ້ງທີ VI ຂອງໜ່ວຍພັກກົມອຸດສາຫະກຳ ແລະ ຫັດຖະກຳ ຈັດຂຶ້ນໃນວັນທີ 18 ມິຖຸນາ 2019 ທີ່ສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ, ກະຊວງອຸດສາຫະກຳ ແລະ ການຄ້າ ໂດຍການເປັນປະທານຂອງ ທ່ານ ປອ ບົວວັນ ວິລະວົງ ເລຂາໜ່ວຍພັກກົມອຸດສາຫະກຳ ແລະ ຫັດຖະກຳ ໃນກອງປະຊຸມຄັ້ງນີ້ໄດ້ຮັບກຽດຢ່າງສູງທີ່ໄດ້ຮັບຕ້ອນ ສະຫາຍ ນາງ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍ ສະຫາຍ ພັນທອງ ພິດທຸມມາ ກຳມະການປະຈຳພັກກະຊວງ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ຜູ້ຕາງໜ້າໜ່ວຍພັກອ້ອມຂ້າງກະຊວງອຸດສາຫະກຳ ແລະ ການຄ້າ ແລະ ຜູ້ຕາງໜ້າອົງການຈັດຕັ້ງມະຫາຊົນເຂົ້າຮ່ວມ ລວມທັງຫມົດຈຳນວນ 58 ສະຫາຍ.
ກອງປະຊຸມເຫັນດີ ແລະ ເອກະພາບຮັບຮອງເອົາບົດລາຍງານການເມືອງ ແລະ ບົດສຳຫລວດການນຳພາລວມ ໂດຍມີການຕີລາຄາໝາກຜົນ ການຈັດຕັ້ງປະຕິບັດ ແລະ ການເຄື່ອນໄຫວວຽກງານໄລຍະ 2015-2019 ແລະ ກອງປະຊຸມຍັງໄດ້ຮັບຮອງເອົາທິດທາງເຄື່ອນໄຫວວຽກງານຂອງໜ່ວຍ ໃນໄລຍະ 2020-2024 ເຊິ່ງມີທິດທາງລວມ ແລະ ຄາດໝາຍສູ້ຊົນ ດ້ານການເມືອງແນວຄິດ, ດ້ານການຈັດຕັ້ງ, ດ້ານວິຊາສະເພາະ ແລະ ອົງການຈັດຕັ້ງມະຫາຊົນ, ການຄຸ້ມຄອງ ແລະ ການຂະຫຍາຍຫນ່ວຍພັກຂອງກົມ.
ກອງປະຊຸມໄດ້ຮັບການໂອລົມອັນມີຄວາມໝາຍສຳຄັນ ຈາກສະຫາຍ ນາງ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງອຸດສາຫະກຳ ແລະ ການຄ້າ ໃຫ້ທິດທາງຫລາຍດ້ານ ເປັນຕົ້ນ ສຶກສາອົບຮົມການເມືອງແນວຄິດ , ການຈັດຕັ້ງປະຕິບັດວຽກງານ ສຽງສ່ວນນ້ອຍ ຂຶ້ນກັບສຽງສ່ວນຫລາຍ, ການຊູ້ສົນໃຫ້ເປັນອຸດສາຫະກຳປຸງແຕ່ງ ທີ່ຫັນສະໄໝ ແລະ ພັດທະນາວຽກງານຫັດຖະກຳໃຫ້ຄຽງຄູ່ກັນໄປ. ກອງປະຊຸມດັ່ງກ່າວໄດ້ຮັບຜົນສຳເລັດຢ່າງສູງ ແລະ ປິດລົງໃນວັນດຽວກັນ.